Fiðrildin á leið á toppinn...

Ætlaði að skrifa einhvern rosalega djúpan bloggpóst í dag og eitthvað en veistu, ég er eiginlega bara óvinnufær vegna fiðrildamergðarinnar í maganum á mér! Akkuru? Jú, af því að í dag kemur nýja bókin mín út!

Það er alveg magnað hvað maður getur orðið skíthræddur við að sýna umheiminum það sem maður hefur fram að færa. En veistu, ég er búin að ákveða að segja bara "skítt með það!". Þeim sem líkar bókin, líkar hún, og þeim sem ekki líkar hún, líkar hún ekki. Og það er barasta allt í lagi. Því að maður getur aldrei verið fyrir alla. Sumir eiga eftir að fíla hana í botn og fá mikið gagn út úr henni. Aðrir eiga eftir að hafa einhverjar aðrar skoðanir á henni.

Þá er rosalega gott að muna það sem Don Miguel Ruiz skrifaði í frábærri bók sem heitir "The Four Agreements", og ég mæli eindregið með því að lesa (já, og þakkir til Þórunnar vinkonu minnar fyrir að benda mér á hana :)  : "Don't take anything personally". Það er nefnilega þannig að það sem manneskjan hugsar, segir og gerir snýst í rauninni aldrei um aðra, það snýst um hana sjálfa. Fólk sér og dæmir hluti út fá sínum eigin raunveruleika, sinni upplifun og reynslu, engra annarra, og það er eitthvað sem þú getur ekki verið að spá í. Ef fólki líkar ekki það sem ég geri, þá er það barasta þeirra mál en ekki mitt.

Annar góður frasi sem mér finnst gott að minna mig á af og til er: "Þegar fíflunum fjölgar í kringum þig, líttu í eigin barm". Ég stend mig stundum að því að hugsa eitthvað miður gott um annað fólk - við gerum það ábyggilega öll einhvern tímann - en ég er farin að verða nokkuð góð í að stoppa mig af og hugsa "af hverju er ég að hugsa þetta?" og undantekningarlaust hefur ástæðan ekki með viðkomandi að gera, heldur mig. Mig og mitt óöryggi. Og þannig er því eflaust líka varið með aðra.

Góð vinkona mín sagði einu sinni við mig að það sem fólk, sem nyti almennt velgengni væri hræddast við, væri að standa eitt eftir á toppnum. Að þora að skara fram úr. Að skilja hina eftir sem ekki stefni svo hátt. Mig langar að trúa því að við fögnum þeim sem stefna á toppinn og komast þangað. Ég er ótrúlega stolt af mörgum af mínum vinum, fjölskyldu og viðskiptavinum sem hafa og eru að ná frábærum árangri í því sem þau eru að gera. Hér eru nokkur dæmi:

Eyrún vinkona mín í RóRó, sem er núna á Indiegogo með Lúllu dúkkuna sína og gengur rosa vel. Vantar bara herslumuninn að hún nái markmiðinu sínu (endilega leggið henni lið hér). Frábær manneskja með frábæra vöru sem á eftir að breyta lífi margra fjölskyldna í framtíðinni.

Rúna vinkona mín sem gaf út sína bók fyrr í haust, Branding Your X-Factor, og jetsettast um allan heim til að vinna með forsetum, og funda með stjórnendum stórra alþjóðlegra fyrirtækja. Hún er ein af þessum manneskjum sem lyftir öllum í kringum sig upp á hærra plan og er sko ekki feimin við að styðja sitt fólk á toppinn.

Rakel Sölvadóttir, frumkvöðull í Skema og brautryðjandi í forritunarkennslu fyrir börn og unglinga. Það sem hún er að gera hér heima og með reKode úti í Bandaríkjunum er magnað og forréttindi að fá að fylgjast með úr stúkusæti.

Ég gæti haldið áfram að telja upp magnaða einstaklinga að gera ótrúlega flotta hluti en þessi póstur er þegar orðinn ansi langur á persónulegu nótunum ;)

Fögnum þeim sem stefna hátt og ætla sér á toppinn. Það er fólkið sem getur gert heiminn að betri stað.

Ég viðurkenni það alveg að mig langar á toppinn. Mig langar að lifa góðu lífi af því að vinna með fólki sem hefur ástríðu fyrir því sem það er að gera og vill byggja upp spennandi og áhugaverð fyrirtæki sem skipta máli. Mig langar að skrifa bækur, halda námskeið, fyrirlestra og vinnustofur út um allan heim og þessi bók sem kemur út í dag er liður í þeirri vegferð. Ég vona að sem flestir fagni henni, nái sér í eintak og njóti góðs af. Hún er m.a.s. frí á rafrænu formi á Amazon fram á sunnudag - og þú getur fengið Kindle lesara app í öll helstu tæki ;)   Þú finnur allar upplýsingar hér: http://thoranna.is/marketinguntangledbook/

P.s. Þú ert líklega að spyrja þig núna "hvað í ósköpunum hefur þetta að gera með markaðsmál?" - ja, þetta var bara svona smá persónuleg tjáning hjá mér á degi þar sem ég á erfitt að einbeita mér vegna spennings, en veistu, þetta hefur nefnilega heilmikið með markaðsmál að gera. Þau fyrirtæki sem ná árangri á markaði, sem ná árangri í markaðsmálunum, það eru fyrirtækin sem eru óhrædd við að standa upp úr, stefna á toppinn og standa fyrir eitthvað. Hugrekki er nefnilega öflugt vopn í markaðsstarfinu, svo þegar maður fer að spá í þetta, þá er þessi póstur barasta akkúrat spot on fyrir markaðsmálin ;)

Megir þú ná á þann topp sem þig langar að ná á - og ef ég get hjálpað þér að komast þangað þá er það barasta ennþá betra!

knús
Þóranna

Mig langar að kenna heiminum markaðssetningu ;)

Það er alveg að koma að þeim árstíma sem ég verð að fara að sjá eina af uppáhalds auglýsingunum mínum - þú manst eftir henni ;)   Kók auglýsingin þar sem þau standa öll á hæðinni og syngja um hvernig þau vilja kenna heiminum að syngja "in perfect harmony" :)  Ég elska þessa auglýsingu. Það koma ekki jólin fyrr en ég er búin að sjá hana :)

Ég er söngkona (jahá, þú vissir það ekki, er það? Hver veit, kannski leyfi ég þér einhvern tímann að heyra í mér ha ha ha :)   ... en mig langar ekkert að kenna heiminum að syngja. Það er fullt af góðu fólki út um allt að gera það. Mig langar hinsvegar að kenna heiminum markaðsfræðin. Sérstaklega þeim sem reka lítil og meðalstór fyrirtæki þar sem fyrirtækið er ekki bara fyrirtæki heldur stór partur af lífinu og tilverunni. Mig langar að kenna þeim markaðsfræðin sem stofna fyrirtæki af því að þá dreymir stóra drauma. Hverjir sem þessir draumar eru. Fyrir suma snýst þetta um frelsi, um að vera sinn eigin herra, að hjálpa fólki, og fyrir suma fyrst og fremst um peninga - það er svo margt sem liggur að baki. En það er semsagt það sem ég brenn fyrir. Mig langar að hjálpa til við að byggja upp fyrirtæki sem fólk elskar - sem fólk elskar að eiga viðskipti við en ekki síður fyrirtæki sem eigendurnir elska að reka. Syndin er að allt allt of mörg frábær fyrirtæki deyja vegna þess að það skortir þekkingu á markaðsmálunum. Og það viljum við ekki!

Markaðsmálin eru hinsvegar orðinn þokkalegur frumskógur! Ég er markaðsnörd. Ég nördast í markaðsmálunum allan daginn og ég verð m.a.s. stundum ringluð. Eftir að í bættist netið, samfélagsmiðlarnir, snjallsímar o.s.frv. o.s.frv. - eru möguleikarnir endalausir, tækifærin endalaus, og endalausir hlutir sem hægt er að klúðra. Svo ég tók mig til og skrifaði bók! Er það ekki það sem maður gerir þegar mann langar að kenna einhverjum eitthvað? ;)

Ég vona að þessi bók gefi þeim sem ekki eru sérfræðingar í markaðsmálunum góðan grunn sem þeir geta byggt markaðsstarfið á og hjálpi fólki að átta sig á þessu öllu saman. Það virðist bara hafa tekist nokkuð vel - ég hef a.m.k. fengið mjög góðar viðtökur hjá þeim sem hafa fengið að lesa bókina nú þegar og þú getur séð ummæli frá sumum þeirra hér (þar sem þú getur líka náð þér í sýnishorn úr bókinni ;)  http://thoranna.is/marketinguntangledfree/

Í bókinni er farið yfir þau fimm atriði sem liggja til grundvallar öflugu markaðsstarfi: markhópana, samkeppnina, brandið, markaðssamskipti (aðgerðirnar) og markaðskerfið. Svo er planið að kafa dýpra í hvert og eitt þessara fimm atriða í bókum sem koma út í framhaldinu og gefa þér þannig allt sem þú þarft til að taka þetta markaðsdót allt saman í nefið! :)

Ég vona að þú grípir þér eintak af sýnishorninu. Um leið og bókin kemur út þá læt ég þig vita og þá gætirðu nælt þér í hana frítt fyrstu dagana eftir að hún kemur út á Amazon. Gríptu sýnishornið, og fylgstu svo vel með tölvupóstinum þínum til að grípa frítt eintak! Ekkert nema gróði! ;)

Já og þeir sem næla sér í sýnishorn eru svo velkomnir í Marketing Untangled Series hópinn á Facebook þar sem við ræðum markaðsmálin. Ég kíki reglulega inn og tek þátt í umræðum og svara spurningum. Endilega komdu og vertu með!

Jæja - eigum við ekki að fara að rokka þessi markaðsmál?!

xo

Þóranna

p.s. hér er hlekkurinn aftur, bara svona til öryggis ;)  http://thoranna.is/marketinguntangledfree/

Ertu með hausinn rétt skrúfaðan á? - hugarfarið skiptir öllu

Nýlega skrifaði ég grein í Markaðinn þar sem ég skammaði kvenþjóðina svolítið fyrir að vera stundum sjálfar sér verstar. Ef þú last hann ekki, þá geturðu gert það hér.

En veistu, þó ég hafi kosið að skrifa þennan pistil til kynsystra minna, þá er margt í honum sem á við alla. Ég sé það nefnilega alltaf betur og betur eftir því sem ég vinn með fleirum í að efla markaðsstarfið þeirra, að hugarfarið skiptir öllu. Það er hægt að kenna flest. Það er hægt að kenna þér að greina markhópana þína og samkeppnina. Það er hægt að kenna þér hvernig branding virkar, hvað það gerir fyrir þig og hvernig þú átt að gera það. Það er líka hægt að kenna þér á hinar ýmsu markaðsaðgerðir, að nota twitter, að skipuleggja vefsíðuna þína, að búa til Facebook auglýsingar o.s.frv. o.s.frv. Það er hægt að kenna þér að skipuleggja þig svo að markaðsstarfið taki ekki meiri tíma en þarf og sé áhrifaríkara fyrir vikið. Það sem ég get ekki kennt þér er grundvallar hugarfarið. Og hugarfarið skiptir öllu.

Hver þekkir ekki sögur af íþróttamönnum sem voru rosalega efnilegir en hausinn var ekki í lagi og þess vegna varð aldrei neitt úr þeim? Hver veit ekki um einhvern sem hefur alltaf brillerað í skóla en einhvern veginn aldrei plumað sig í lífinu? Mörg okkar könnumst við einhvern með frábæra vöru eða þjónustu sem aldrei nær flugi. Hvað er að klikka? Jú, yfirleitt hugarfarið.

Hversu vænlegt til árangurs er þetta: “Ég bara skil ekki þetta Facebook dótarí”, “Ég gæti aldrei selt neinum neitt”, “Ég kann ekki, get ekki, skil ekki, vil ekki …”? ;)      Ef þetta er hugarfarið, þá er alveg eins gott bara að fara að gera eitthvað annað. Ég get lofað þér að þú markaðssetur ekki neitt ef þú hugsar svona - alveg sama hvað ég kenni þér mikið og hvað varan þín eða þjónusta er frábær! :)

Ég og fjöldi annarra þarna úti getum kennt þér og hjálpað þér með markaðsstarfið þitt. En þú þarft að koma að borðinu með rétta hugarfarið. Þú verður að vera jákvæð(ur) og læra það að þú getur allt sem þú vilt. Ég veit alveg að ef ég og þú vildum verða heilaskurðlæknar þá gætum við það alveg (mig reyndar langar það bara ekki neitt, og þess vegna hef ég aldrei orðið það :)

Maður verður líka að læra að biðja um hjálp en líka að nýta þá hjálp til að efla sjálfan sig - ekki bara láta gera hlutina fyrir sig. Skrúfaðu hausinn rétt á. Láttu jákvæðnina ráða för. Segðu “ég þori, get og vil” og láttu vaða! Og ef þig vantar aðstoð þá er alltaf gott fólk til staðar ;)

Þangað til næst ;)
xo

Akkuru geriru þetta, akkuru, akkuru, akkuru?

Manstu eftir litlu rassálfunum í Ronju ræningjadóttur sem spurðu í sífellu “akkuru gerirún etta, akkuru, akkuru, akkuru?” Hefurðu einhvern tímann spurt þig af hverju þú gerir það sem þú gerir?

Ég trúi því að það geti verið betri og verðugri ástæður fyrir því að reka fyrirtæki en bara til að græða peninga. Þú getur kallað mig barnalega, en svoleiðis er það. Staðreyndin er líka sú, að þau fyrirtæki sem standa fyrir eitthvað annað og meira en bara að græða peninga, ja … þau græða oftast líka meiri peninga!

Í bókinni Passion Brands: Why Some Brands Are Just Gotta Have, Drive All Night For, and Tell All Your Friends About fjallar Kate Newlin um hvað það er sem gerir það að verkum að sum fyrirtæki eru hreinlega elskuð. Og elskuð fyrirtæki eignast trygga viðskiptavini, sem ekki bara fara ekki annað að versla, heldur bera út boðskapinn og skapa þannig meiri viðskipti. Það kemur skýrt fram í bókinni að fyrirtæki sem standa fyrir eitthvað, hafa einhver gildi, og deila þeim gildum og sýn á lífið með viðskiptavinum sínum, þau uppskera meiri tryggð og betri viðskipti.

Það þýðir hinsvegar ekki að finna bara eitthvað og nota það í markaðsskyni. Ef þú t.d. ákveður að segja heiminum að umhverfisvernd skipti fyrirtækið þitt máli, þá þýðir ekki bara að segja það og setja eina flokkunartunnu á bak við skúr. Þú verður þá að taka það inn í fyrirtækið og taka það alla leið. Hvítþvottur dugir ekki. Þess vegna er betra að finna hvað það er sem skiptir þig og þitt fólk virkilega máli og skiptir líka markhópinn ykkar máli.

Ég á nokkur uppáhaldsfyrirtæki sem byggja á sterkum gildum. Mörg gera þetta rosalega vel. Ekkert endilega fullkomlega, enda er það erfitt, en mjög vel.

Patagonia er t.d. í miklu uppáhaldi hjá mér. Það er útivistarfyrirtæki, mjög líkt því sem við þekkjum með 66 Norður og Cintamani. Fyrirtækið byrjaði út frá ástríðu stofnandans, ástríðu fyrir fjallaklifri og útivist, og stendur fyrir það enn þann dag í dag. Umhverfisvernd er eðlilegur fylgifiskur þess að vera náttúruunnandi, og er stór hluti af Patagoniu brandinu. Það eru ekki mörg fyrirtæki sem auglýsa að fólk eigi ekki að kaupa vöruna þeirra, líkt og þeir gerðu t.d. með “Don’t buy this jacket” auglýsingunni, sem hvatti til umhverfismeðvitundar og minni neysluhyggju. Þetta er þeirra "mission statement": "Build the best product, cause no unnecessary harm, use business to inspire and implement solutions to the environmental crisis."

Þú getur séð Patagoniu Pinterest töfluna mína hér.

Ben & Jerry's er annað dæmi um brand sem hefur mjög sterk gildi og sýn á lífið. Brandið er byggt upp úr hippalífi stofnendanna og hefur enn í dag sterk gildi frá því þar sem samfélagsleg ábyrgð og umhverfisvitund spila stóra rullu. Þeirra mission statement segir m.a.: "Social Mission: To operate the Company in a way that actively recognizes the central role that business plays in society by initiating innovative ways to improve the quality of life locally, nationally and internationally."

Þú getur séð Ben & Jerry’s Pinterest töfluna mína hér.

Coke fékk mikla jákvæða umfjöllun nýlega þegar þeir ákváðu að setja auglýsingar á pásu og láta allt það fé sem þeir venjulega hefðu látið fara í auglýsingar renna heldur til fórnarlamba náttúruhamfaranna á Filippseyjum. Þetta er náttúrulega frábært, og þeir fengu heldur betur umfjöllun um þetta sem hefur sennilega ekki verið minni en áhrifin sem auglýsingarnar hefðu haft. Maður getur samt ekki annað en sett spurningamerki við þetta útspil þeirra, þar sem þeir taka þetta ekki alla leið. Þeir hafa hingað til ekki gert þetta að stefnu og af mörgu sem þeir gera þá virðist ljóst að það er gróði frekar nokkuð annað sem ræður förinni. T.d. benti góður vinur minn á að þeir neita að nota áhrif sín sem einn aðalstyrkaraðili Ólympíuleikanna í Moskvu til góðs til að hafa áhrif á mannréttindabaráttu í Rússlandi - ó já, og sá hinn sami sá tvöfalda auglýsingu frá þeim í bíó eftir að þeir höfðu gefið út að þeir ætluðu ekkert að auglýsa. - það er vandlifað í þessum heimi :)

Ég er um þessar mundir að vinna með tveimur mjög spennandi sprotafyrirtækjum sem byggja á mjög sterkum gildum.

Fafu framleiðir vörur sem styðja félagslegan, tilfinningalegan og heilaþroska barna í gegnum opinn leik. Þau Hulda og Tom sem standa að baki fyrirtækinu hafa ástríðu fyrir því að bæta veröld barna og það sést í öllu sem þau gera. Áherslan á tengslamyndun, þroskandi leik og virðing fyrir börnum er algjörlega til grundvallar sem gerir það að forréttindum að fá að vinna með þeim í markaðsstarfinu, þar sem ég veit að ég er ekki að þessu bara til að selja vörur, heldur til að bæta líf þeirra barna og fjölskyldna sem við náum til.

RóRó mun koma með á markað á næsta ári dúkku sem hjálpar fyrirburum og ungabörnum að jafna andardrátt og hjartslátt og þar með sofa betur og veita nærveru þegar foreldrar geta ekki verið hjá þeim, s.s. í hitakössum á vökudeildum. Að baki þessari vöru liggur ástríða fyrir því að veita börnum bestu byrjun í lífinu sem möguleg er og hjálpa okkur foreldrum að veita barninu okkar það besta, jafnvel þegar við getum ekki verið hjá þeim af einhverjum ástæðum.

Meira að segja ég, markaðsmanneskjan, sem fólk heldur nú oft að séu algjörir skrattar, ég er ekki í þessu út af peningunum (trúðu mér, ef það væri málið, þá væri ég róandi að því öllum árum að fá eitthvað hot shot djobb í markaðsdeild í stóru fyrirtæki :)   … það sem ég geri sameinar ástríðu mína fyrir því að markaðsnördast og það að geta hjálpað fólki að gera það sem það dreymir um - því fólk fer jú sjaldnast út í eigin rekstur nema vegna þess að það virkilega langi til þess. Staðreyndin er sú að flest lítil fyrirtæki lifa ekki af, og í langflestum tilfellum er það vegna þess að það vantar upp á í markaðsstarfinu. Og það er það sem ég vil bæta svo að þessi fyrirtæki nái að lifa og fólk geti gert það sem það dreymir um.

Hvað skiptir þig máli? Af hverju gerir þú það sem þú gerir? Segðu fólki frá því. Það skiptir máli!

Kanntu að segja nei?

Við erum flest í hjarta okkar gott fólk. Flest okkar vilja allt fyrir alla gera og það er náttúrulega voðalega gott. En þegar kemur að fyrirtækinu þínu þá er það eiginlega barasta dauðasynd! Ha? Jú, sjáðu til.

Í hverju ertu góð(ur)? Af hverju? Það er venjulega þannig að maður er góður í því sem maður nýtur þess að gera og maður nýtur þess að gera það sem maður er góður í. Þetta helst í hendur – eggið og hænan.
Svo stofnar maður fyrirtæki til að gera það sem maður er góður í. En það er ekkert auðvelt. Það er að mörgu að huga og það tekur tíma að byggja hlutina upp. Maður er mjög mjög mjög meðvitaður um að maður þarf á tekjum að halda. Án þeirra gengur þetta jú ekki. Svo maður fer að taka hliðarspor. Grafíski hönnuðurinn sem vill vera í að gera brand útlit samþykkir að gera útsölubækling fyrir lágvöruverðsverslun. Fatahönnuðurinn sem vill hanna eigin galakjóla tekur að sér að breyta jakkafötum. Og markaðsráðgjafinn sem elskar að vinna með stefnu og brand samþykkir að veita ráðgjöf við uppsetningu á Facebook síðu og AdWords auglýsingum.

Og hvað gerist?

1. Maður verður hundfúll að vera að gera eitthvað sem maður vill ekki vera að gera.
2. Maður gerir hlutina ekki eins vel af því að maður nýtur þeirra ekki, sem bitnar á gæðum vinnunnar og ánægju viðskiptavinarins – að ekki sé minnst á hvað það er erfitt að eiga jákvæð og góð samskipti við einhvern sem er að biðja mann að gera eitthvað sem maður vill ekki gera.
3. Maður verður þekktur fyrir að gera allskonar hluti sem maður vill ekkert vera þekktur fyrir og það dregur að sér fleiri svoleiðis verkefni en ekki þau sem maður vill vera þekktur fyrir.
4. Maður hefur engan tíma til að gera það sem maður vill gera, það situr bara á hakanum, og loksins uppgötvar maður að maður hefur ekki komið nálægt því í lengri tíma.
5. Maður verður þekktur fyrir að gera allskonar, en ekki bara eitthvað ákveðið, og þá er maður bara allskonar maðurinn en ekki „sérstaklega góður í þessu“ maðurinn – og hver heldurðu að fái draumaverkefnin þegar þau koma upp? Jep, „sérstaklega góður í þessu“ maðurinn.

Ég er búin að vita þetta lengi lengi í hausnum. Þetta er allt í fræðunum. En ég er alltaf að læra þetta betur og betur á eigin skinni. Þess vegna fókusera ég á markaðsstefnuna, brandið og að velja tólin til að byggja það upp.

Ég kann ágætlega á Facebook, en ég vísa þeim sem vilja læra á það á hana Amy vinkonu mína, sem er Facebook sérfræðingurinn.

Ég kann ágætlega á LinkedIn, en ég vísa þeim sem vilja massa LinkedIn á Lewis vin minn.

Ég kann ansi vel á Pinterest – var m.a.s. með mitt eigið námskeið á netinu í að nota það, en Melanie vinkona mín er sérfræðingurinn, svo ég vísa fólki sem vill læra á Pinterest til hennar.

Já og YouTube og vídeó í markaðssetningu. Kann eitt og annað, en ekki nærri eins mikið og hann James félagi minn.

Ég er hætt að taka að mér verkefni á þessum sviðum því þau taka frá mér tíma og orku til að gera það sem ég er best í og elska að gera, og taka allan fókusinn úr brandinu mínu og veikja það.

Á ensku er talað um „Jack of all trades, master of none“ – og þegar fólk vill láta gera eitthvað almennilega þá vill það meistarann. Þú getur ekki verið meistarinn í öllu. Veldu þitt svið, haltu þig við það og ég lofa að ef þú heldur það út þá muntu uppskera eins og þú sáir ;)

Ekki vera leiðinleg(ur)!

Eitt af því sem maður er alltaf að reyna að segja fólki sem þarf að markaðssetja vöruna sína eða þjónustu, er að vera öðruvísi, vera sérstakur, áhugaverður, skipta fólk máli. Ég er á því að maður eigi alltaf að vinna að því að fá ákveðinn hóp fólks til að elska fyrirtækið þitt, vöruna eða þjónustuna. Og fyrir vikið halda sumir stundum að ég sé barasta rugluð!

En veistu, neibb, ég er það ekki. Mamma sagði alltaf við mig, “ef það er þess virði að gera hlutina, þá er þess virði að gera hlutina vel”. Fyrirtækið þitt, varan eða þjónustan er ekki einhver smá partur af lífinu sem er allt í lagi að láta bara malla. Ef þú ert með eigið fyrirtæki, viltu þá ekki gera hlutina eins vel og mögulegt er? Fá eins mikið og mögulegt er út úr því? Og viltu ekki hafa gaman í vinnunni? Gamanið kemur með því að gera hlutina vel, stefna lengra, og skapa eitthvað spennandi, eitthvað óvenjulegt, eitthvað áhugavert. Geeeeeeeeeeeeeeerðu það, ekki vera leiðinleg(ur)!

Nú er komin fram á sjónarsviðið fáránlega góð sönnun þess að það er alveg sama hvað þú er með - þú getur gert það áhugavert! Fyrirtækið byrjaði 2007 með tveimur manneskjum og er enn smátt í sniðum. Varan er ekki beint eitthvað sem markaðsfólk hugsar “jibbííí, gaman að selja þetta!” - varan er sprey sem kemur í veg fyrir kúkalykt. Jamm - ég sagði það - kemur í veg fyrir kúkalykt. En þeim tekst að vera áhugaverð, fyndin og skemmtileg - og ég efast ekki um að fólk sem notar þessa vöru elskar þau. Þarna ertu með raunverulegt vandamál til að leysa og þau eru skemmtileg með það.

Ég setti saman Pinterest töflu með upplýsingum og dæmum um hvernig þau gera þetta. Kíktu á hana - þetta er algjör snilld og ætti að vera þér innblástur til að gera hlutina áhugaverða, alveg sama hvað þú ert að selja! Pinterest.com/thoranna/fantastic-marketing-and-branding-poo-pourri/

Ég vil aldrei aldrei aldrei aftur heyra að einhver sé með vöru eða þjónustu sem er ekki hægt að gera eitthvað áhugavert við!

Hvernig ætlar þú að gera þína vöru eða þjónustu áhugaverða - og eitthvað sem fólk getur elskað?

Í MáM þjálfuninni er mikil áhersla lögð á branding, og inni í þeirri vinnu að finna hvað það er sem er áhugavert við vöruna þína eða þjónustu og hvernig þú getur komið því á framfæri og fengið fólk til að elska það sem þú hefur að bjóða. 

Bladí bladí bla bæt, blah, RAM, bladí bla MHz bla...

Skildirðu þetta ekki alveg? Hvað meinarðu?! En það er fullt af fólki sem heldur að fullt af fólki skilji þetta og skilur ekkert af hverju fullt af fólk er ekki æst í að kaupa af þeim! :)

Það hafa komið að máli við mig nokkrir aðilar sem reka tölvuþjónustur. Þetta eru minni aðilar á markaði, bjóða upp á ýmsa þjónustu í kringum tölvurnar og selja oft líka tölvubúnað. Flestir þessir aðilar eru minnst að selja til tölvusérfræðinga. Helstu viðskiptavinirnir eru einstaklingar og lítil og meðalstór fyrirtæki, þar sem ekki er upplýsingatækni-sérfræðingur innanborðs, eða ef það er einhver sem sér sérstaklega um þau mál þá er það oft aðili sem hefur nokkuð almenna þekkingu og getur haft yfirsýn yfir hlutina, frekar en að vera sérfræðingur á einhverju sviði.

Málið með þessi fyrirtæki er að þau eru eiginlega barasta öll eins - ja, a.m.k. þau sem ég hef skoðað. Það sker sig ekkert þeirra almennilega úr og ekkert þeirra talar á mannamáli um hvað þau geta gert fyrir viðskiptavini sína heldur týna flestir sér í græjutali og fagmáli. Fólki er þessvegna svo sem alveg sama hvar það verslar. Það kaupir þar sem það fær besta verðið - verð er því það helsta sem keppt er á - og ef fólk kaupir vegna þess að þjónustan er góð, þá er það oftar vegna þess að það var heppið og lenti á honum Sigga eða Bjössa eða einhverjum sem er bara náttúrulega þjónustulundaður, ekki af því að fyrirtækið sem slíkt hafi tekið þjónustumálin sín föstum tökum.

Það eru mikil tækifæri á þessum markaði til að skera sig úr. Tala við fólk á mannamáli, en ekki í
bætum og Hz og RAM og hvað þetta heitir allt. Hvaða vanda þarf að leysa? Hvaða þörf þarf að mæta? Og að láta skína í gegn að það eru engar heimskulegar spurningar, bara heimskuleg svör. Efnismarkaðssetning (sem ég hef talað um áður hér í blogginu) er tilvalin fyrir tölvufyrirtæki. Vertu sérfræðingurinn sem veit allt um þessi mál  en segir það á mannamáli, veitir fólki þær upplýsingar sem það þarf. Þannig myndu þau byggja upp samband, traust, sérfræðiorðspor og orðspor fyrir þjónustulund.

Já og byggðu upp áhugaverðan brand persónuleika sem fólki líkar við. Þorðu að vera skemmtilegur, litríkur, hjálplegur, þægilegur, glaðlegur. Veldu aðra liti en svartan og grænan  með Matrix style myndefni, eða rauðan og gráan með allt of miklu dóti og tilboðsstjörnum um allan vef. Þróaðu aðgreinandi og áhugaverðan tón í því hvernig fyrirtækið talar. Ekki vera alveg eins og allir hinir. OK, ég veit, augljóst dæmi, en af hverju heldur þú að Apple hafi skotið öðrum fyrirtækjum á sínum markaði ref fyrir rass? Ekki með því að tala í bætum, Hz og RAM.  iPod: “A 1000 songs in your pocket” - það er það sem skiptir máli! (Það er reyndar svolítið skondið að það að taka Apple sem dæmi er algjör klisja, en samt er bransinn ekki búinn að fatta þetta með hundinn! :)

Ég hef ekki enn unnið fyrir neitt af þeim tölvufyrirtækjum sem hafa komið að máli við mig. Af hverju? Vegna þess að hingað til hafa þau flest viljað koma og fá að vita hvað aðgerðir þau ættu að fara í: “eigum við að kaupa Facebook auglýsingar, Google AdWords, eigum við að auglýsa þarna eða á hinum staðnum...” og ég einfaldlega vinn ekki þannig. Það er bara einfaldlega bull að byrja á þeim endanum. Þú þarft að þekkja markhópinn, samkeppnina, vita hver þú ætlar að vera, hvernig þú ætlar að vera öðruvísi en hinir og hvernig þú vilt að fólk sjái þig, áður en þú getur ákveðið hvaða markaðsaðgerðir eru réttar fyrir þig og til þess að þær virki þegar þú ferð að nota þær. Ef þú þekkir ekki markhópinn hvernig ætlarðu þá að tala til hans á Facebook? Þú endar í tilboðum og læk-deila-kvitt leikjum og álíka vitleysu, því að þú ert ekki að veita fólki neitt annað sem er neins virði því þú veist ekki hvað skiptir þau máli. Ef þú hefur enga sýn á hvernig þú vilt að fólk sjái þig, hvert þú vilt að brandið þitt sé, þá verður efnið þitt sundurleitt, ósamræmt, ómarkvisst og áhrifalaust, því að þú veist ekki hver þú vilt vera og hvernig fólk sér þig, fólk sér engan samræmdan persónuleika og hefur þess vegna enga leið til að líka við þig, hvað þá að mynda við þig samband.

Ég viðurkenni það algjörlega, mig dauðlangar að vinna fyrir tölvufyrirtæki sem er tilbúið að rífa sig út úr kassanum og gera hlutina almennilega. Það væri hrikalega spennandi verkefni. “Come on, íslenska Apple!” ha ha ha … Ég veit að það er hægt að skilja samkeppnisaðilana eftir í rykinu. En það þýðir hugrekki, dugnað, þolinmæði, metnað og að vera a.m.k. pínku oggulítið klikkuð - ég auglýsi hér með eftir svoleiðis tölvufyrirtæki til að vinna með! :)

Brennur þú innan í þér?

Fæst okkar ákveða einn daginn að þau langi að lifa innihaldslausu lífi. Fæst okkar langar að vinna vinnu sem við höfum engan sérstakan áhuga á. Fæst okkar ákveða að setja á fót fyrirtæki bara af því... Úff - þeir sem þekkja það vita að maður setur ekki á fót fyrirtæki bara að gamni sínu - það er hörkuvinna, lengi vel fyrir engin laun og þetta er svona eins og að vera komin aftur í háskólanám - maður er aldrei raunverulega í fríi því að maður gæti alltaf verið að gera eitthvað (og finnst maður alltaf eiga að vera að gera eitthvað). Maður setur ekki af stað rekstur nema að brenna fyrir það. Nema að þetta sé virkilega það sem maður vill gera í lífinu. Þetta er svona eins og að ætla að verða leikari. Ég uppgötvaði það eftir þriggja ára háskólanám og nokkur ár í bransanum að mig langaði bara alls ekkert að vera leikari - og trúðu mér, það er ekki bransi sem maður er í nema að það sé það eina í lífinu sem maður getur hugsað sér að gera!

Ég hitti á dögunum unga og hrikalega flotta fatahönnuði með mjög spennandi  verkefni í gangi. Við ræddum markaðsstrategíu og staðsetningu á markaði. Ættu þau að fara í það að framleiða fullt fullt og selja almenningi ódýrt, ættu þau að staðsetja sig kannski  í dýrari kantinum en samt ekki hátíska (svona merki sem eru seld hjá Sævari Karli, eða Sand, Marc Jacobs, Karen Millen eða álíka staðsetning) , eða ættu þau að fara í að vera hátískumerki. Margir höfðu ráðlagt þeim að fara millileiðina, en þau langaði það ekki. Þau langaði að fara í hátísku. Viðskiptafólkið sagði það of áhættusamt. Reyndar finnst mér það viðskiptalega lógískt, sérstaklega í þessum bransa, því að þó þú græðir aldrei á hátískunni þá er það hún sem vekur athygli og kemur þér á kortið, og selur svo vörurnar sem þú framleiðir og selur á viðráðanlegra verði á almennum markaði. En það er ekki bara lógískt í Excel skjalinu. Það er nauðsynlegt til þess að halda verkefninu gangandi.

Ef að þessir ungu hönnuðir myndu hlusta bara á viðskiptafólkið í kringum sig, sleppa hátískunni og fara beint á sölumarkaðinn þá gerist tvennt. Í fyrsta lagi verða þau bara enn eitt merkið á yfirfullum markaði og það verður mjög erfitt að ná í gegn og ná athygli. Hitt sem gerist er að eldurinn sem brennur innan í þeim, ástríðan fyrir því sem þau gera, deyr smátt og smátt.  Hversu spennandi heldur þú að föt hönnuð af fólki sem hefur ekki ástríðu fyrir því sem það er að gera séu? Hversu lengi heldurðu að fyrirtækið lifi eftir að eldurinn innra með hönnuðunum deyr út?

Það er nauðsynlegt að finna leið til að láta ástríðuna og viðskipti fara saman. Ekki bara fyrir þig eða fólkið þitt til að halda ykkur gangandi heldur er ástríða öflugur hluti af markaðssetningunni þinni. Það er eldurinn innra með sem gerir það sem þitt fyrirtæki gerir sérstakt. Fólk finnur það ef þið brennið fyrir það sem þið gerir og það finnur það ef ykkur er sama. Af hverju ætti að ég að versla við fyrirtæki ef fólkinu í því er alveg sama? Ef allir brenna fyrir það sem þeir gera, þá verður auðveldara að kveikja í viðskiptavinunum. Það verður auðveldara að byggja upp brandið þitt og auðveldara að fá fólk til að segja frá. Það verður auðveldara að vekja áhuga, fá fólki til að líka við ykkur og treysta ykkur...

Fyrir hvað brennur þú og þitt fólk? Hvernig kemur það fram í því sem þið gerið? Hvernig sér viðskiptavinurinn ástríðuna ykkar?